Nýtt knæ

Tað er umráðandi, at tú heldur steðg við blóðtynnandi heilvágsviðgerð áðrenn tú skal skurðviðgerast. Hvussu langur steðgurin skal verða, verður avtala við skurðlæknanum.

Um tú vanliga tekur fiskaolju, er sera týdningarmikið, at tú heldur ein steðg við hesum í minsta lagið 1 viku áðrenn skurðviðgerðina.

Tá tú fært boð, um nær tú skal til skurðviðgerð, verður tú biðin um at fortelja hvagar tú skal útskrivast til. Innleggingartíðin er stutt, vanliga eitt døgn, og tað er týdningarmikið at tú hevur gjørt av, um tú skal heim ella aðrastaðni.

Tá tú fert heim verður krav sett, um at onkur er heima hjá tær teir fyrstu 24 timarnar eftir skurðviðgerðina. Tað er bert galdandi, um tú verður útskrivað/ur sama dag, sum sjálv skurðviðgerðin verður framd.

• Tú skalt hava klæðir við, sum eru løtt at fara í og úr, t.d. joggingbuksur og góðar skógvar, ið hava hælkapp. 
• Mælt verður til, at prýðislutir og peningur eru eftir við hús.
• Loyvt er at hava farteldu og fartelefon. Tó skal hetta ikki verða til ampa fyri onnur.
• Kvøldið fyri innleggingardagin skalt tú fara í bað.
• Tú skalt ikki nýta neglalakk, húðkrem ella smyrsl.
• Høkjurnar og venjingarskráin frá fysioterapeutinum skulu
  takast við.

Tú skal vera fastandi frá fastari føði og mjólkaproduktum 6 tímar áðrenn skurðviðgerðina, og 2 tímar áðrenn fyri drekka (vatn og saft). Vanliga verður sagt, at tú skal vera fastandi frá midnátt áðrenn skurðviðgerðina, eins og tú í seinasta lagið kann drekka vatn ella saft kl. 06:00, um morgunin á skurðdegnum.

Slitnu partarnir í knænum verða skiftir út við metal og plast. Skurðviðgerðin tekur uml 1-1,5 tíma. Eftir skurðviðgerðina skalt tú til viðrakning, inntil tú fær førleikan at fara á beinini aftur.

Innleggingartíðin er í miðal 0-2 dagar. Summi fara heim á skurðdegnum (á kvøldi), og hetta er oftast avtala áðrenn. Tú kanst annaðhvørt útskrivast um morgunin, á miðdegi ella um kvøldi.

Við útskrivan skalt tú:

• Klára at ganga og um neyðugt, eisini í trappum.
• Klára at fara í og úr songini.
• Klára ymiskar gerandisstøður, sum at fara á vesi.
• At pínustillandi viðgerðin er nøktandi.
• At títt blóðprosent (hæmoglobin) er í rættari legu.
• At tú hevur tikið røntgenmynd av knænum, ið er skurðviðgjørd.

Áðrenn útskrivan verður tú biðin um at svara nøgdsemiskanning. Kanningina fært tú frá einum sjúkrarøktarfrøðingi undir innleggjan.

Tú fær ein pakka við heim, ið hevur:

• Yvirlit yvir heilvági, sum tú skal taka.
• Heilivág til fyrstu dagarnar, m.a. pínustillandi, kvalmastillandi og fyri at halda gongd í búkinum.
• Eyka plástur til skurðin.
• Eina tíð til uppfylgjan í ambulatoriinum áleið tvær vikur eftir skurðviðgerðina, har sárið verður kannað. Vanliga verður seyma aftur undir húðini, soleiðis at eingin tráður ella klips eru at taka.
• Her verður tú eisini sædd/ur av fysioterapeutunum, sum gera eina heildarmeting av knænum.
• Telefonnummar til deildina, sum tú kann ringja til eftir útskrivan, um tú ivast í onkrum ella er bangin fyri at okkurt ikki er, sum tað skal tær næstu tríggjar vikurnar eftir skurðviðgerðina.

Um tørvur er á tí, fært tú eina sjúkramelding. Sjúkrameldingin er vanliga í upp til tríggjar mánaðir fyri tey, ið hava eitt kropsligt krevjandi arbeiði.

• Endurvenjing og førleikarnir skulu endurvenjast stigvíst.
• Tú skalt helst ikki liggja á knæ.
• Tú kanst koyra bil aftur, tá tú hevur fult tamarhald á beininum. Tað tekur vanliga áleið seks vikur, áðrenn fólk eru før fyri at koyra bil aftur. Eisini er krav, at tú ikki tekur morfin, sum pínustillandi heilvág, tí tá er ikki loyvt at koyra bil.