Ergo- og fysioterapi á Suðuroyar Sjúkrahúsi

Hevur sjúklingurin tørv á fyribils hjálpartólum í sambandi við útskrivan, syrgir Ergo- og fysioterapiinfyri at fáa hetta í lag. Umsókn verður skrivað við undirskrift hjá sjúklinginum. Er sjúklingurin ikki førur fyri at samskifta um hetta, kann avvarðandi vátta umsóknina saman við terapeutinum.

1. Til láns: gangistativ, talarastólur, transportkoyristólur, kokustólur, baðibonkur, artrodesupútur, grípitong, sokkaílatari, høkjur o.s.fr 

2. Ikki til láns: song, seingjaborð, luftmadrassa, komfortkoyristólur, standilift, sitilift, c-pap tól og onnur serstøk hjálpartól. Neyðugt er at søkja um hesi tól.

Sjúkrahúsið syrgir fyri, at umsóknarbløð o.a., sum er viðkomandi í mun til hjálpartólini eru klár. Sjúkrahúsið kann eisini gera eina leiguavtalu við Hjálpartólamiðstøðina um so er, at vit ikki hava júst tað hjálpartólið á goymslu, sum tygum tørva. Hetta er gjarna lyfta, luftmadrassir o.a.

Starvsfólkini greiða gjølla frá mannagongdunum viðvíkjandi hjálpartólunum, og sjúklingurin fær høvi at royna hjálpartólini, áðrenn útskrivan.

Ergo- og fysioterapiin setir seg í samband við økisterapeutin, alt eftir hvussu hjálpitólini roynast í heiminum.

Økisterapeuturin hjá Bú- og heimatænastuni samskiftir við Ergo- og fysioterapiina um ivamál ella spurningar eru til hjálpitólini.

Trygdartelefon er til sjúkling, sum býr einsamallur. Trygdartelefonin tryggjar skjóta hjálp, um sjúklingurin skuldi verið fyri einum óhappi í heiminum. Trygdartelefonin situr um handliðið, og sjúklingurin trýstir á ein knøtt fyri at fáa hjálp.

Ergo- og fysioterapiin fyllir umsóknarblaðið út út frá samrøðu við sjúkling og  avvarðandi. Sjúkrahúsið kallar inn til samrøðu millum sjúkling, avvarðandi og terapeut.

Eitt spurnarskjal skal fyllast út, sum sjúklingurin skal svara. Møguleiki er fyri at hava 4 avvarðandi á trygdarlistanum, sum tilskilast í nummarrøð.

Starvsfólkini greiða gjølla frá, hvussu trygdartelefonin riggar. Hevur sjúklingurin tørv á at trýsta á knøttin, so ringir hjá nr. 1. Svarar fyrsti avvarðandi ikki, fer uppkallið víðari til nr. 2 o.s.fr.

Er eingin, ið kann svara uppkallinum, fer kallið víðari til 112 og sjúkraflutningstænastan kemur á staðið.

Tá trygdartelefonin er móttikin, fær sjúklingurin ein avvarðandi at seta trygdartelefonina til. Ein einføld vegleiðing fylgir við, og trygdartelefonin er klár at taka í nýtslu beinanvegin.

Økisterapeuturin setir seg í samband við Ergo- og fysioterapiina, um ivamál ella spurningar eru. Hevur sjúklingurin spurningar til eitthvørt við trygdarkallinum, kann økisterapeuturin hjálpa og um neyðugt taka samband við Ergo- og fysioterapiina.

Sjúkrahúslækni metur um tørv og sendir ávísing.

Undir innleggjan verður dentur lagdur á at fyribyrgja førleikamiss og at endurvinna mistan førleika. Vant verður eftir tørvi og tí endurvenjingarpotentiali, ið sjúklingurin hevur. Endurvenjingin/venjingin verður skipað av fysioterapeuti, ergoterapeuti og psykomotoriskum terapeuti, í tøttum samstarvi við starvsfólk á seingjardeildini og kostfaklærd starvsfólk. Áðrenn sjúklingurin verður útskrivaður, verður mett um tørvur er á hjálpartólum, og um neyðugt, verður heimavitjan gjørd. Um tørvur er á tí, verða hjálpartól bíløgd.

Eftirmeting verður gjørd og endurvenjingarætlan útflýggjað.

Tað er ávíkavist Almannaverkið og kommunalu samtøkini, ið varða av venjing eftir útskrivan. Móttakandi geiri verður kunnaður og endurvenjingarætlan send teimum, um tørvur er á víðari endurvenjing.